بالبداية اعتذر الفترة الماضيه عن تقصيري في تحديث مدونتي لاني نقلت الاستضافه ( ان شاء الله قريب بتكلم عنها بتدوينه ) 

بالاضافه الى اني ماكنت املك وقت مناسب لان الترم الصيفي كان ضغط واطلع مب رايق :unsure:

والحمد لله اليوم انتهى الدوام الصيفي باقي الاختبارات النهائيه الاسبوع الجاي – لاتنسوني من دعواتكم :wub: –

— 

كتبت قبل فترة سلسلة من التدوينات لطرق اكثر اقتصاديه من المكاتب – غالبا – .. بعض المكاتب تستخدم مواقع الحجز من النت حسب ماسمعت من بعض الشباب 

فالافضل لك انك انت تقول تبحث واسهل واكثر اقتصاديه لك :wink:

التدوينات السابقة كانت على النحو التالي

ارخص واسهل الطرق  – المقدمه – 

حجوزات الطيران – تطبيق على رحلة الى دبي – 

 وعدتكم اكتب عن الحجز للفنادق كيف واسهل الطرق وهذي تدوينه اليوم ان شاء الله

 

 

 

وان شاء الله التدوينة المقبلة بتكون عن رحلة الى دبي والاماكن اللي فيها وتطبيق كل السابق فيها سواء كانت رحلة بالسيارة او بالطيارة  :smile:


بسم الله نبدأ

افضل طريقة واسهل طريقة للحجز من النت هي المقارنه بين مواقع الحجز .. بعض المواقع تحصل عندها عروض على فندق معين او وقت معين 

موقع  Hoteloogle يغنيك عن المقارنه بين المواقع 

وش طريقة الموقع ؟. 

يبحث في مواقع الحجز المعروفه مثل Booking , Hotels .. الخ 

مواقع كثيره جدا يروح يبحث فيها ويعطيك الزبده :tongue:

يعرض لك اقل الاسعار وبعض التعليقات والتقييمات عن الفندق .. وكلش بتكلم عنه ان شاء الله 

هذا رابط الموقع 


تقدر تختار من فوق لغه عربية – اضغط على الايقونه الخضراء فوق يمين  – ..

لكن بالنسبه للشرح بيكون على اللغه الانجليزيه .. لان احيانا الترجمه تكون مش حالك .. الانجليزي واضح وبسيط :wub:


هذي واجهة الموقع اول ماتفتحه

الشغله بسيطه 

فيه شغله مهمه .. اذا كنتم مثلا 3 اشخاص .. انصحك تحجز غرفه واحده وتحط شخصين .. بعض الفنادق يقبل .. وتقدر تضيف سرير اضافي بمبلغ بسيط تضيفه 

لان موب كل الفنادق بالبحث بتطلع لك اذا حطيت 3 اشخاص بغرفه واحده .. نفس الكلام اذا كنتم 5 حطها مثلا غرفتين شخصين لكل غرفه

طبعا تحط اسم المدينة وبيطلع لك خيارات .. اخترت زي ماهو مكتوب

التاريخ الميلادي لازم تكون متأكد منه بالتقويم .. التاريخ الموجود بالمثال تاريخ من ثاني العيد :wink:

بعدين تضغط Search

بتلاحظ هالعمود يسار قاعد يحمّل .. هذا معناته قاعد يبحث بمواقع الحجز هذولي كلها :happy:


بعد مايكتمل البحث بيطلع كذا 


بوضح كل شغله 

اول شئ 


العملة .. تبغى النتائج تطلع لك الاسعار بالريال السعودي ؟ .. حط SAR -Saudi riyal 

ترتيب النتائج .. زي ماهو واضح بالصورة 

اول شئ بيطلع لك ترتيب النتائج حسب الشعبيه >> ماعترف فيه :whistle:

ثاني خيار وثالث خيار بالسعر .. ترتيب حسب الاقل سعر او حسب الاغلى 

بعدين يجي ترتيب حسب النجوم تصاعدي او تنازلي

بعدين حسب اسم الفندق ( ترتيب ابجدي وكذا ) ماتحتاجه الا اذا تبي تشوف فندق معيّن 

اللي بعده المسافه الاقرب الى الابعد او العكس .. وهذي اذا كنت تبغى مكان معيّن حاطه ببالك :wink:

بعدين نشوف العمود الايسر

اذا تبي تغير التاريخ او المدينة او الغرف وعدد الاشخاص 


طيب المكان وش مقصود .. شف هنا 

عاده يحط وسط المدينه .. اذا اخترت تريب الفنادق حسب السعر مايناظر لها الخيار اذا حطيت ترتيب حسب المسافة اقرب او ابعد لازم تعدل هالخيار افضل لك


طيب انا بحط مثال بوضح عليه 


لاحظ هالمثال .. حطيت ترتيب الفنادق حسب السعر .. من الاقل سعر الى الاغلى 

لاحظ عدد النجوم جنب اسم الفندق 

تحت اسم الفندق عنوان .. الشارع وكم يبعد عن وسط المدينة


التعليقات اللي تشوفه بالازرق OK , Very Good, Medicre وجنبها رقم 

لاحظ اول فندق مكتوب OK 3.1 

معناته اخذ 3.1 من 5 حسب تقييم الزوار 

عدد المقيّمين تلقاه تحته .. اول مثال عدد اللي قيموه 279 شخص 

لاتعتمد كثير على التقييم لكن حطه ببالك وشف السلبيات اللي يذكرونها 


طبعا لايغرك اللي مكتوب From وجنبه سعر .. هذا سعر مبدئي بدون ضرائب وقيمة حجز بعض المواقع ياخذ عموله 

شوف السعر اللي تحت .. يعطيك السعر لليله مع الضرائب 

طيب بختار الحين فندق  ونكمل الشرح عليه 

اخترت هالفندق .. مثلا 

تقييمه من الزوار 4 من 5 .. عدد اللي قيموه 156 شخص

السعر 174 ريال لليلة مع الضرائب 

مكانه بشارع ميناء سعيد 

ضغطنا عليه بيطلع لنا كذا 


بشرح كلش بالتفصيل 


طبعا بيكون مرتب حسب السعر النهائي لاحظ ان اول نتيجه طلعت لنا كامل السعر 696.8 ريال .. هذا المجموع لـ 4 ايام

– حسب المثال اللي حطيته – 


فيه شغله مهمة لازم تنتبه لها اذا ماكنت متأكد انك تبي تحجز او لا يعني اذا فيه نسبه انك تلغي الحجز بعد فترة انتبه منها مهمه جدا

:pouty:مثلا لو لاحظت هالعرض لاحظ اللي محدد بالاحمر 

اذا قريت كذا .. معناته ماتقدر تسترجع المبلغ لو حجزت .. فـ خلك منتبه لهالنقطه كويس :dizzy:

غالبا اللي تجي غير مسترجعه معناته عرض من الفندق ..

انتبه لاتحجز الا اذا كنت متأكد انك بتروح مالها داعي يروح عليك مبلغ الحجز :wink:

نكمل 

اهم شئ اذا كنت رايح بالسيارة احرص على وجود مواقف

لانه قد صار لنا موقف مع الشباب حجزنا فندق ومانتبهنا لنقطه المواقف

وصارت مشكلة المواقف ..

نوقف مكان بعيد,  تحت الشمس , ومواقف بفلوس بعد :getlost:



هذي الخريطه كذا تجيك توضح لك الفنادق وتوفرها بالخريطه وقربها من الفندق اللي اخترته .. والنقط المهمة او المعالم تلقاها بالاخضر 

اضغط على Hide عشان يخفي اللي تبيه 

مثلا حطيت Hide جنب الفنادق الثانيه لاني مهتم اشوف وين مكان هالفندق بس 

يطلع كذا 


الحين صار اوضح عرفت بالضبط وينه وكيف اوصله وكل شئ

طيب نكمل


هذا تقييم الزوار .. يعطيك الموقع الزبده لاحظ الاحمر يقولك تقريبا 6 اشخاص قيموا مساحه الغرب .. 4 منهم يقولون انها صغيره 

:unsure:وكذا 

مهم هالتقيم يكون عندك خلفيه عن بعض السلبيات او الايجابيات 

اخر شئ تحت يقولك تقدر تتابع التقييمات بمواقع الحجز الثانية مثل booking , hotels :smile:

هذولي المواقع تحصل فيها تقييم اكثر كونها اقدم واكثر زوار وتجربه من هالموقع :wink:



بعد ماتختار الموقع اللي بتحجز منه واعجبك سعره تضغط عليه بيفتح صفحة جديده يحولك على موقع الحجز ذا 

بالغالب تلقى المواقع تتعامل بالدرهم او بالدولار 

اغلب مواقع الحجز بتحصلها بالانجليزي .. لكن بعض المواقع تجي بالعربي بعد 

الى هنا وصلت لنهاية الشرح الحمد لله 

ان شاء الله يكون واضح وبسيط 

انا دليتك هنا على ابسط طريقه تعرف منها الفنادق  وافضل الاسعار ..طريقة الحجز نفسها تختلف من موقع لاخر وصعبه اوضحها كلها لكن بالمجمل وغالبا واضحه

– احرص دائما تحجز بدري قبل الرحلة بشهر شهرين على الاقل بتحصل عروض كويسه واسعار مناسبه 

– انتبه من سالفة الدفع غير مسترد اذا حجزت .. لا تحجز الا اذا متأكد بنسبه كبيرة  انك  تبي تروح 

– اذا كنت بالسيارة احرص على وجود مواقف بالفندق .. لان بتتعب مع سالفة المواقف العمومية 


اذا حصلت لي فرصه  اشرح موقع حجز وكيف خطوات الحجز فيه بالتفصيل .. ان شاء الله بحطه 


التدوينة الجايه بتكون عن رحلة الى دبي بالتفصيل والاماكن اللي فيها :wink:

9 CommentsClose Comments

9 Comments

  • jno_0n
    Posted 11/08/2011 at 12:27 صباحًا 0Likes

    ماشاء الله عليك ياسر .. كفيت و وفيّت .. معلومات كويسة ومفيدة
    شكرا كثير .. بالمفضلة

  • Posted 11/08/2011 at 12:52 صباحًا 0Likes

    شكرا لك ِ استاذه ايمان 🙂

  • arwa
    Posted 11/08/2011 at 7:41 مساءً 0Likes

    شرح ممتاز  ..
    شكراً لك (f)

  • محمد الهزاع
    Posted 12/08/2011 at 5:14 صباحًا 0Likes

    شكرا ياسر .. شرح وافي وتوني أمخمخ عليه وأعرف وش قصته ..:)

  • Posted 12/08/2011 at 7:28 مساءً 0Likes

     

    اروى .. الحمد لله واهم شئ الاستفاده 

    ابو هزاع.. وش هالخلفيه الحمراء هههه :dizzy: اذا مخمخت عليه ودقرت بشئ  قلي بس :cool:

  • asaz1
    Posted 13/08/2011 at 9:14 صباحًا 0Likes

    تسلم يدينك ياسر ويعيشك 😛

  • Posted 13/08/2011 at 3:43 مساءً 0Likes

    ههههه عبود يعيشك يازوينو 😀

  • ثامر
    Posted 17/08/2011 at 8:46 مساءً 0Likes

    شي اكثر من جميل يا بعدي شرحك وافي
    ومرهـ استفدت منه ربي يسعدك وين ما كنت
    وجعله في ميزان حسناتك 

  • Posted 23/08/2011 at 1:15 صباحًا 0Likes

    ثامر : آمين والحمد لله اهم شئ تستفيدون :wink:

Comments are closed.