Zip Car تطبيق وموقع تقدر عن طريقه تستأجر سيارة ( موزعين سيارتهم حول المدن ) ممكن تحصل سيارات بمواقف مول او مواقف عامة او على شارع عام ممكن تلقى شئ قريب منك .
السيارات حسب المنطقة اللي انت فيها وانواعها من سيارات صغيره الى جيوب SUV حتى فان نقل البضائع .
متوفرة في عدد محدود من الدول حاليا امريكا وكندا و بريطانيا وتايوان وكوستاريكا وتركيا وايسلند.
طريقتهم بالحساب بالساعه او باليوم ( بعد 10 ساعات يعتبر سعر ثابت مثلا السيارة اجارها 12$ بالساعه بعد 10 ساعات خلاص تدفع 100 دولار يعني خذها يوم كامل افضل لك )
الشئ المميز انهم يتكفلون بالبنزين يعني تاخذ السيارة وبعد ماتمترها تدفع ببطاقتهم عند المحطة ( ايضا حسب المنطقة اللي انت فيها انا ببورتلاند اوريقن لي 70$ تدفع على مرتين باليوم )
ايضا ماحتجت الى رخصة امريكية او دولية وقبلوا رخصتي السعودية عند التسجيل
بخصوص التأمين عندهم 3 انواع :
- Standard وهذا اللي يجي مع الاشتراك الاساسي نسبة التحمل من العميل 1000$
- Plus نسبة التحمل 375$ وطريقته تدفع 5 دولار شهريا
- Premium نسبة التحمل 0$ وتدفع 9$ دولار بالشهر
هذي سمعت عنها واتصلت عليهم واكدوها لي : بطاقة Zipcar تخولك لدخول متاجر Nike المخصصه للموظفين ( الخصم يوصل ل40% ! ) وللاسف كورونا حرمتني التجربة 🙁
من السلبيات:
- ان السعر مبالغ فيه مقارنة بمحلات تأجير السيارات بالذات اذا بتستاجر لاكثر من يوم .
- لك عدد محدود بالكيلومترات ( اليوم لك 180 ميل او 289 كيلو متر تقريبا طبعا هذي بامريكا اي زياده بيحسبون كل ميل ب0.45$ او 0.55$ حسب نوع السيارة )
- اذا اخذت السيارة من مكان معين .. لازم ترجعها لنفس المكان للاسف! لو سمحوا بميزة تاخذها من مكان وترجعها مكان ثاني بيكون شئ رائع جدا !
طبعا فتح السيارة واغلاقها بواسطة الكرت ( او التطبيق نفسه ! )
المفتاح يكون معلق ومربوط داخل السيارة وماتقدر تشيله معك !
كل سيارة تركبها تحصل بطاقة Visa خاصة بدفع البنزين ( حسب الولاية اللي انت فيها يتم تحديد المسموح لك استخدامه . تجربتي في اوريغون 35$ مرتين يعني مجموع 70$ باليوم )
مب كل السيارات عليها استكر ZipCar هنا مثالين لسيارات جربتها سوبارو وفولكس واجن قولف
ايضا جربت فان نقل الاغراض سعره 17.75$ للساعه طبعا مقارنة بشركة مثلا Uhaul غالي جدا لكن الميزة لو احتجت الفان تحجز وتمشي بثواني مايحتاج حجز مسبق او رخصه امريكية تلقى الفان مثلا بمواقف مول او مواقف عامة في اكثر من مكان بالمدينة .
حسب المدينة بعض المدن فيها كمية سيارات كافيه وتنوع ممتاز للانواع هنا مثلا تغطيتهم لجزء من بورتلاند
نجي الان لطريقة التسجيل والاشتراك: بالبداية تسجل بالموقع ( وهذا رابط دعوة من عندي يعطيك 25$ رصيد )
ان كنت طالب ادخل وسجل كطالب واضف اسم الجامعة اللي تدرس فيها وبيصير سعر الاشتراك السنوي 15 دولار فقط ( بدال اشتراك 70$ سنوي او 7 بالشهر ! )
من هالصفحة هنا تقدر تشوف اذا جامعتك متوفرة وبعدها تسجل اول سنه ب 15 دولار
بعد التسجيل بيجيك ايميل يطلبون منك ترسل لهم رخصتك و ID او جواز ( انا ارسلت رخصتي السعودية بالتسجيل )
الزبده ؟
الخدمة ممتازة وتستاهل تخليها معك وقت “الزنقات” اذا احتجت تطلع اكثر من مشوار ضروري وكان Uber او Lyft بيكلفك اكثر، رح خذ سيارة ساعتين ب 24 دولار ارخص وافضل لك من مشوار واحد من اوبر .
